前港姐入行3年冇返過屋企，終於放假慶祝媽咪60大壽

前港姐蘇韻姿出道三年時間人氣持續高企，事關佢喺2017年開始參演處境劇《愛回家之開心速遞》，憑住喺劇中演主要人物之一「熊心如」深入民心，作為新人嘅佢唔單止憑借呢個角色成功入屋，而且演技亦大獲觀眾好評同認可。

最近，蘇韻姿飛返加拿大探親，順便為媽咪慶祝60歲大壽！佢喺社交平臺貼出母女合照，大批網友都紛紛留言大贊媽咪保養得好，點睇都唔似係60歲，指兩母女睇落似兩姊妹。

蘇韻姿仲開心留言：「好開心攞到一個長假，慶祝媽咪生日，當然我都有返去母校皇后大學，嗰啲朋友都好好，請假陪我返去大學。」

雖然難得可以放假，但返去加拿大後嘅蘇韻姿，其實除咗吃喝玩樂之外，仲有大把私事需要時間去處理。

佢又話：「當年選完港姐之後，公司叫我暫時唔好走住，之後好快就安排我拍劇，所以我都冇返過多倫多執埋啲嘢，再加埋我隔咗幾年先返嚟，所以好多濕碎嘢都要搞，好似車牌照嗰啲都已經過咗期，要去重新申請。」

據悉，蘇韻姿自細就喺加拿大多倫多成長，佢有兩個細佬同一個細妹，從小學四年級開始，佢就一直學習關於藝術嘅課程，後來大學畢業于皇后大學，同樣係主修戲劇，副修音樂等藝術課程。

2015年，蘇韻參加加拿大新時代電視「星秀動全城Vocalibre 2015」歌唱比賽，并喺節目中勇奪亞軍，之後就被安排喺當地擔任電視節目同客串加拿大劇集。

2016年，蘇韻姿嚟港參選香港小姐，雖然冇緣三甲，但卻止步于四強獲得殿軍名次，之後就獲TVB青睞，安排佢入讀為期三個月嘅演藝進修班。

次年，蘇韻姿畀監制選中出演《愛回家之開心速遞》演熊心如（紅衫魚）一角，並因此人氣急升。