前港姐宣佈二胎BB出世,但未透露係男係女

前港姐楊思琦喺2012年未婚生女,而家囡囡已經7歲,舊年10月份楊思琦透露再度大肚,并自爆年中已經同圈外男友喺外地秘密結婚,懷孕其實係一早計劃好嘅事,囡囡知道做姐姐都好興奮。

日前楊思琦仲喺社交平台「露面」,今日有消息指佢已經誕下第2胎,但因為新型冠狀病毒疫情持續蔓延,會盡量留喺屋企休息。

楊思琦接受傳媒訪問嗰陣承認已經「卸貨」,但產後覺得好攰,指而家忙住照顧BB,等身體好一啲,就會同大家分享BB嘅相,而佢仲冇透露二胎係仔定係女。

楊思琦喺2001年參選香港小姐奪得冠軍入行,同時仲奪得當年“最上鏡小姐”、“網上最奪目小姐”、“纖體美態獎”等六個殊榮,佢係香港小姐競選史上攞獎最多嘅冠軍佳麗。

楊思琦當選港姐冠軍之後,馬上獲得TVB力捧拍劇,曾經主演過多部經典劇集,有《強劍》、《突圍行動》、《天機算》、《鐵馬尋橋》、《千謊百計》等。

楊思琦喺TVB嘅最後一部劇集係2014年嘅《大藥坊》,之後楊思琦主要喺大陸發展,多以商演為主。

2019年中楊思琦宣佈與圈外男友喺外地結婚,同年10月份公布大肚嘅消息,不過楊思琦對老公嘅姓氏同職業保密,只強調係一個中國人,并以“愛的森林”嚟形容兩人關係。

Like MisshkNews Facebook!不出门也能知天下事~

發表回覆

你的電郵地址並不會被公開。