前港姐轉行之後窮到燶，而家想返TVB食回頭草

現年28歲、英國劍橋大學法律系畢業嘅前港姐麥明詩，半年前放棄同TVB續約，改簽「一年一Show」嘅綠葉合約，轉行到著名跨國顧問公司擔任商業顧問，重拾律師老本行。

不過做番「老本行」冇幾耐嘅麥明詩，之前佢喺《#后生仔倾吓偈》中，大呻轉行之後窮到燶，而家想返TVB食回頭草。

據悉，麥明詩現時做顧問嘅人工四萬幾，雖然對普通打工仔而言好吸引，但比起做藝人嘅時候，麥明詩隨便拍一個廣告、出一個活動閑閑哋都六位數字起跳，收入認真大減幾倍！

而且OL工作刻板，不如藝人拍廣告、拍劇、出活動般多姿多采，加埋見到身邊藝人朋友嘅幕前演出，搞到麥明詩心郁郁想重返娛樂圈。

3月中，原本去咗外地工作嘅麥明詩，突然靜英英返香港出席導演葉念琛嘅生日會，不過據悉佢出席嘅真正目的係向TVB高層樂易玲提出返娘家。

而日前，麥明詩嘅OL打扮亦終于畀曝光，日前見到佢喺中環返工，著上白色連身裙淡妝上陣，而且仲斟茶遞水做阿四，好在有猛男護航。

對于畀影到做「阿四」買外賣，麥明詩笑言係同同事一齊買飲品，又坦承現時做顧問工作，為咗保障客戶、同事同公司私隱，唔方便透露太多。