生夠6個?前TVB花旦自曝囡囡係高妹:七個月有一歲高度

舊年年尾,前TVB花旦李亞男正式升呢做媽咪,為老公王祖藍誕下小公主,雖然係首次做媽咪,但原來李亞男唔係初哥,事關佢由細負責照顧比佢細11歲嘅妹妹,因此照顧新生兒對佢嚟講,都算係頗有經驗。

李亞男話:”因為當年媽咪身體唔好,要我幫手帶妹妹,所以喂奶、換尿片同掃風對我嚟講唔係難事,我唔係「緊張媽咪」,生完BB個幾月就同老公去旅行慶祝結婚紀念。

我可以離開囡囡,但旅游中都掛住囡囡,但唔會每五分鐘去Check一次電話,我哋都好嘆二人世界。無論有幾多個小朋友都要有二人世界,夫妻關係好重要,唔可以生完BB就忽略對方。”

傾到囡囡而家已經7個月大,但係面容同身高似乎更偏向媽咪,李亞男都直言囡囡個樣同自己細個嗰陣完全係一個餅印,這令佢覺得好驚喜。

佢話:“我佗囡囡嘅時間都諗住Baby個樣,當佢出世時係Surprise,而且她好高,而家七個月係一歲高度。(將來畀佢參選港姐或者做模特兒?)佢乜都可以試,唔試唔知道自己鐘意啲咩,但要努力讀書先。”

佢話:“以前太後生,會諗有自己嘅生活,想周圍飛去流浪,但而家安定落嚟都好幸福,流浪可以等個女大個先。原來有一個屬於自己嘅BB係咁開心同幸福,真係做咗媽咪先知道。

(再抄?)因為我係開刀,唔可以咁密,要休息一年先,我想多啲時間集中喺個女身上。(想生幾多個?)老公話兩個、四個或者六個,三個會畀忽略,我諗住兩個先。”

而李亞男與王祖藍兩個人拍拖到而家已經14年,至於如何令感情保鮮,李亞男就表示雖然經歷過離離合合,但最後仍堅持落去。

佢話:「因為經歷多咗先可以一齊,唔容易,所以有乜事都會讓步,我呢行見過好多男仔,最後都覺得佢係最好。我哋日日都會傾計同互贊,我成日贊佢靚仔,身邊嘅人好頂唔順,尤其係奶奶。”

唔理點樣,希望佢哋可以一直甜蜜落去,唔知道小公主長大之後,會唔會同媽咪一樣好靚女呢?祝福祝福!

Like MisshkNews Facebook!不出门也能知天下事~

發佈留言

發佈留言必須填寫的電子郵件地址不會公開。 必填欄位標示為 *