「TVB小花」密密監工半億新居,趕做牛年新娘!

娛樂圈喺牛年年初一傳嚟喜訊,據悉現年47歲嘅「TVB視帝」馬國明將會同「TVB小花」湯洛雯喺今年拉埋天窗,婚期暫定喺8月份。

雖然馬國明、湯洛雯作風低調,但女方畀發現呢排密密去半億新居監工睇裝修,加埋之前放出口風指如果馬明冧莊視帝就結婚,雖然宜家冧莊唔成,但結婚計劃繼續進行。

由于馬國明要趕拍《白色強人2》,預計7月先完成拍攝,加埋要去深圳佢景,鑒于現時疫情仲未穩定嘅情況下,婚禮暫定喺8月舉行,規模亦視乎疫情發展而定。

記者問到湯洛雯8月出嫁嘅傳聞,佢話:「佢日日開劇邊度有時間呀,反而係我媽咪日日去睇裝修啫,因為嗰度係我同屋企人住㗎。」而準新郎馬國明就話:「未呀,未呀,多謝關心。」睇嚟佢哋對於結婚仲係相當口密。

其實馬國明、湯洛雯自從認愛以來,佢哋表現得相當甜蜜,更已經到達同居試婚階段,男方幾乎長駐女友喺紅磡嘅香閨。

而馬國明亦甚得未來外父湯鎮宗歡心,湯洛雯亦好識做,孝順未來老爺奶奶,一早已經融入馬家,馬湯兩家家長早就開綠燈,就差一對主角「認頭」。

Like MisshkNews Facebook!不出门也能知天下事~

發佈留言

發佈留言必須填寫的電子郵件地址不會公開。 必填欄位標示為 *