莫文蔚隔離完成，剪手帶大曬玉背照慶祝

莫文蔚呢幾年好少喺香港蒲頭，但今年係佢時隔十年再次推出廣東歌《呼吸有害》，未知會唔會出席頒獎禮，但日前莫文蔚已經返香港，今日完成14日隔離出關。

莫文蔚除咗剪手帶慶祝之外，尋日仲喺社交平台大曬昔日玉背跳落水嘅相同片段，完全唔似50歲！

呢幾年莫文蔚跟住德國籍老公Johannes喺德國生活，喺佢社交平台見到佢完成隔離，卒之喺今日出關，佢急不及待行到尖東海邊散步，留言話：「莫莫噠出沒請注意，隔離程序順利完成」。