TVB封城藝人照開工，防疫措施做到足

日前，由於女歌手施匡翹確診新冠肺炎牽連TVB近百人，TVB安排病毒測試追蹤接觸者，更落令封城進行全面消毒清潔，雖然封城但唔少劇集照常進行拍攝。

好似「TVB小花」林夏薇、「TVB小生」丁子朗等為《七公主》開工，林夏薇仲喺社交平台曬相，見到佢埋位前「罩不離身」，更以防面罩遮面，防疫措施做到足。

而林夏薇亦偶遇到為《超能使者》開工嘅陳展鵬，并合照留念。

另外，尋晚《東張西望》繼續進行直播，「TVB新聞小花」利穎怡同林溥來戴上口罩開廠，利穎怡笑指好新奇：「第一次戴口罩開工。」

TVB方面，電視城已經采取有關措施，除咗將錄影廠、化妝間全面消毒之外，亦宣布本月19、20號暫不接待駐臺記者入城。

而今日TVB再發布新消息，為減低病毒傳播風險繼續「封城」，喺本星期二（21號）至星期三（22號）仍不接待駐臺記者進入電視廣播城，之後宣傳活動安排會另行通知。