「求叔」黃樹棠因病逝世,終年77歲

黃樹棠喺亞視經典劇集《我和僵尸有個約會》中飾演「求叔」,三年前佢患上大腸癌二期,接受手術之后康復,但上個月因為癌細胞入侵肺部而入院。

尋日,黃樹棠兒子黃榮璋突然喺社交平臺發文表示父親已安詳離世,終年77歲,仲話我慶幸可以陪你行埋人生最后一段路,爸爸您放心,我會照顧好自己,您放心離去吧。

黃樹棠係圈中少有喺麗的電視、亞洲電視同無線電視等四個電視臺工作過嘅演員,1979年佢開始參演多部無線劇包括《楚留香》、《親情》、《網中人》同《千王之王》等。

但黃樹棠只效力無線電視接近三年後離巢,直至2019年先再參演無線劇集《荷里活有個大老千》,亦係佢最後一部無線作品。

黃樹棠曾經講過效力無線得三年嘅原因,佢話喺1982年傾續約嗰陣,對方提出加薪至每月3萬蚊,但當時佢接拍電影嘅片酬係每部60萬蚊。

當雙方一直為續約條件而商討嘅時候,點知道負責傾續約嘅代表話:「我知你幕前幕后都得,但我睇你好得幾耐!」即令黃樹棠火起,佢話:「我一捶打到佢塊面上,最後我畀幾個保安帶走我。」

黃樹棠病逝之后,江美儀喺發文悼念:「老鬼棠,我拍人生第一部電視劇《肥貓正傳》就係同你合作,每年都同我一齊慶祝生日,因為我哋係同月同日生好兄弟!我真係好唔舍得你呀,愿你離苦得樂。」

陳煒亦喺社交平臺悼念棠哥話:「棠哥,永恒國度再會。」

張文慈都喺社交平臺表示:「棠哥,好唔舍得你呀!最可惜疫情關係唔可以探病,見唔到你最后一面,一路好走,永遠懷念你。」

而曾經同黃樹棠喺《我和僵尸有個約會》合作過嘅萬綺雯喺社交平臺發文話:「求叔,好戰友,只愿一路好走,喺彼方繼續瀟灑!」

事後,黃樹棠兒子黃榮璋通過短信回復傳媒話:「多謝關心,爸爸係一位了不起的戰士。」至於后事安排,佢話:「放心,安排好我會再同大家講。」

Like MisshkNews Facebook!不出门也能知天下事~

發佈回覆

你的電郵地址並不會被公開。