《包青天再起風云》已經出咗街有兩個禮拜，唔少人都覺得譚俊彥嘅演出唔錯，而視後胡定欣有幾好戲就更加唔使講，其實「TVB小花」譚凱琪都好好戲㗎。
日前劇集，講到譚凱琪所飾演嘅沈青，相公娶佢為咗傳宗接代，而且相公科舉落第後想出家拋棄沈青，加上家中長輩又對沉青唔好，所以最后殺咗相公。而真相過咗幾年就畀人拆穿，沈青認罪嘅一幕，網民都贊佢喊得好到位，仲緊要贊佢愈嚟愈好戲！
其實譚凱琪好戲都唔係第一日嘅事，佢喺《EU超時任務》中飾演“水晶梨”呢個角色已經吸引咗唔少觀眾注意。
去到2017年嘅《踩過界》，佢飾演形體藝術家“魏雨珍”呢個角色，令到唔少觀眾嚇咗一跳，仲話估唔到佢咁放！
較早前《大帥哥》中飾演“天嬌”，劇中佢表面上善解人意、嬌小可愛，打理好家頭細務，深得劇中老公張衞健信任，實際上係一個間諜。呢個角色令譚凱琪人氣急升，演技受到觀眾肯定。
譚凱琪父母喺佢讀小學嗰陣分開，自此媽咪一個人養大佢四姊妹。為咗媽咪唔洗咁辛苦，譚凱琪18歲就加入娛樂圈做歌手，19歲推出首張CD，將一半人工畀媽咪做家用。譚凱琪話咁多年嚟一直為自己、爸爸、同媽咪三頭家努力！
佢話：「我想爸爸安心享受退休生活，亦唔想媽咪再為錢擔心，所以要更加努力。」，可惜時間愈長，曝光率愈少，公司更因為投資失利，陷入財困，譚凱琪惟有返香港轉行做藝人。
外界一直有傳譚凱琪嘅貧苦生活係假像，指佢有富二代金融才俊男友莊日宇暗中幫手，譚凱琪就澄清對方冇送過豪宅、餐廳股份、司機同名車，連珠寶都未送過，每日都係自己揸車開工，憑自己養活屋企人。
Like MisshkNews Facebook！不出门也能知天下事～
