前華姐畀八條鯊魚包圍,直言我當時真係好驚

前華姐鄧佩儀(Gloria),較早前遠赴斐濟為旅游節目《12個夏天》開工拍攝,雖然節目已經出街,但鄧佩儀日前接受採訪時表示有好多難忘點滴,例如玩越野車、同鯊魚一齊游水等,直言非常刺激!

鄧佩儀笑言:「同鯊魚只有距離一個人嘅位置,真係好近,當我喺水面浮嘅時候,下面就有七到八條鯊魚喺到游,我係有啲驚,雖然教練講掂唔到就唔使驚,但我唔敢喐又唔敢呼吸,呢種恐懼感真係難以形容,一世有一次可以同鯊魚一齊游水,真係好難忘!」

正所謂寓工作于娛樂,拍旅游節目最好玩就係自己可以借啲意暢游一番!鄧佩儀又話,每朝早起身就見到陽光同沙灘,好寫意,好似發夢咁樣!

除咗同鯊魚游水之外,鄧佩儀有幸見證到放海龜嘅時刻,因為當地一年只放兩隻海龜回歸大海,真系好難忘!

鄧佩儀出身于選美嘅佢,係2013年國際中華小姐冠軍得主,自從簽約TVB到而家,佢一直備受栽培同力捧。

近年,鄧佩儀人氣急升更上位成為TVB新晉花旦之一,佢先後參演咗幾部高人氣劇集,演技大受觀眾好評同贊賞!

作品包括《再創世紀》、《鐵探》、《幕後玩家》、《金宵大廈》等,期待鄧佩儀繼續為觀眾帶來多啲精彩作品!

發表回覆

你的電郵地址並不會被公開。 必要欄位標記為 *