恭喜!「TVB御用癲婆」攞最佳女配角,全場尖叫實至名歸

尋晚(1月12日),TVB「萬千星輝頒獎典禮2019」喺將軍澳電視城隆重舉行,一年一度驚心動魄嘅時刻,相信各位家庭觀眾都一定準時喺電視前收看!

每一位攞獎嘅藝人當然都係實至名歸,但其中最令觀眾意外嘅係,就係勇奪「最佳女配角」嘅趙希洛,佢畀稱為今年第一位成功黑馬,成功擊敗大熱選手高海寧,實在可喜可賀!

據悉,由黃智雯上臺頒發「最佳女配角」獎項,當黃智雯宣讀好姊妹趙希洛嘅名攞獎嗰陣,更一度忍唔住激動到落淚,可見兩個人私底認真係姊妹情深。

講到趙希洛,其實佢喺2007年參加過香港小姐嘅競選,成功入圍5強,雖然落選香港小姐,但仲係順利簽約TVB,發展其演藝事業。

到而家趙希洛已經拍劇無數,擁有高學歷嘅佢,全靠一顆熱愛做戲嘅心,一直都留喺TVB甘心做綠葉,縱使一直飾演配角,但趙希洛依然堅持做好每一個角色,希望有一日可以獲得外界認可同肯定。

入行10年嘅趙希洛演過好多角色,最成功嘅一定係喺《金宵大廈》單位《嬰》,飾演憶子成狂嘅何太。

趙希洛曾經先後喺《八卦神探》、《實習天使》、《十二傳說》中演繹瘋癲角色,更畀封為「TVB御用癲婆」。

最后再次恭喜趙希洛獲得「最佳女配角」殊榮,期待未來趙希洛繼續拍攝多啲好劇,為觀眾帶嚟多啲精彩作品,加油!

Like MisshkNews Facebook!不出门也能知天下事~

發表回覆

你的電郵地址並不會被公開。