黑道出身曾經欠千萬巨債,古惑仔「大佬B」走遍大江南北捱出名氣

俗語有云:人不可以貌相,當今娛樂圈就有唔少禾稈冚珍珠嘅隱形富豪,江湖出身,曾經縱橫黑道、坐過監嘅吳志雄,80年代轉行加入娛樂圈,90年代憑藉住電影《古惑仔》中嘅「大佬B」一角而廣為觀眾認識。

而《古惑仔》系列,仲令佢名利雙收,身價一度暴漲。

可惜風光過後,1999年直插谷底,佢網絡同漫畫生意失利,蝕咗近一億,加埋江湖盛傳佢爛賭,當年更有指佢爭下逾千萬巨債。

而出名重情重義嘅古天樂,喺當時就無條件相助,寫咗一張五十萬支票畀志雄嫂,後來吳志雄還錢,古天樂堅拒唔肯收。

2000年,吳志雄開始到內地投靠朋友搞飲食生意,撈咗幾年,直至2009年,佢喺好友嘅穿針引線下,開始喺內地登臺,當年歌酬僅七千人仔。

當時,佢憑住「大佬B」嘅形象出臺,反應熱烈,一唱即爆場,十年間,更成咗各大夜場搶手貨,登臺身價更跳升到五萬人仔一場。

高峰期,佢一個月可以唱足廿幾場,每場歌酬約五萬人民幣,每月隨時過百萬收入,唔怪得畀冠以登臺王嘅稱號。

喺深圳嘅演藝人訓練中心內,吳志雄嘅辦公室墻上,掛滿佢同合作過嘅當紅明星合照。

而佢手上分別戴住一只勞力士玫瑰金版嘅Yacht-Master II,價值約十七萬,以及一只估值幾十萬嘅藍寶石戒指,可見佢行頭勁抽。

發表回覆

你的電郵地址並不會被公開。 必要欄位標記為 *