今年香港小姐競選喺較早時已經進行網上面試，不過除咗網上面試之外，各位佳麗今日（6月30日）都要親身去TVB將軍澳電視城舉行嘅首輪面試。
今年一共有79位佳麗遠赴TVB面試，當中包括較早時已進行網上面試嘅佳麗，由於各位佳麗未經篩選同執樣，質量尚未有保證，佳麗個個心口掛住個「勇」字，群起而攻，只求殺出重圍。
暫時年紀最細嘅就係17歲嘅「月亮妹妹」葉芷澄，可能正值青春期關係，面部皮膚比較差，好似月球表面，佢話讀緊英國課程。
最出位首選21歲Jenny，未畢業，讀緊歷史同Business，但重點佢哨牙；另外一位著黑色tube dress嘅佳麗黃茝荍（Ceci）27歲，任職生物科技基金行政助理，外表老成持重，左胸仲唧出一嚿贅肉。
現年23歲嘅黎懿霆「闊面LuLu」，佢著住紅裙襯圓邊帽，喺英國讀緊心理學，問到有冇信心入圍？坦言：「都冇諗，主要諗住突破自己。」佢嘅奇特造型似足《海賊王》路飛。
現年19歲嘅佳麗司徒稀琳，著住一襲白色露膊裙，加埋特大黑眼圈，同「怪誕屍新娘」竟然有異曲同工之妙，30幾度下，見到都覺得陰風陣陣，問你驚唔驚。
現年25歲嘅混血兒陳希文讀歷史同政治課程，參選係為咗令公公婆婆開心，笑稱算係被逼，但佢睇落真係唔似25歲囖。
以一身文員打扮嘅Tinny最攞膽，佢仲吩咐記者唔好影佢側面，見到佢不停縮肚，期間又不時「凸腩」，擰轉身時又企唔穩，指自己好少著高踭鞋，佢臨走時又吩咐記者：「記得P圖呀！」
「女身男相」嘅Yuki今年23歲，唔講仲以為陸永都走嚟選港姐，記者問到佢點解淡妝示人，佢表示：「聽講話要淡妝嘛！」
當中，亦有「騰雞」一族，23歲Chole一開始影完相就急急腳想走，不過佢錯方向，之後答完記者問題離開嗰陣，再次行錯另一面。
現年19歲嘅潘紫詠Anna，佢宜家讀緊恒大BBA yr 1，特登從西班牙返香港，佢最特別就係要帶埋阿媽嚟面試。
每年港姐首輪面試，都係傳媒同讀者最關注嘅日子，而今年邊個又可以突圍而出呢？我哋拭目以待喇～
Like MisshkNews Facebook！不出门也能知天下事～
